10 mé 2024. Po lo 19èm Journé nasyonal la mémoir lésklavaj, lo bann trète èk zot labolision épila ansanm la Fondation pour la mémoire de l’esclavage, lo müzé istorik de Villèlle i fé in lonér po «lo füzi Mussard».
Coll. Musée historique de Villèle, inv. 1989.184
Coll. Musée historique de Villèle, inv. 1989.184
Coll. Musée historique de Villèle, inv. 1989.184
Larm-la i prétan cé lo füzi lo Roi Louis XV la-fé kado François Mussard, in shassër zésklav renomé dann lil Bourbon, an romèrsiman son travaïy. Po done lanvi domoun fé la shasse bann zésklav la-parti maron, la Compagnie des Indes i anbarasse pa po fé bél-bél kado po lo konte lo Roi la Franse.
Lané 1754, François Mussard, lo pli gran shassër zésklav maron té i komande in patrouy, la gaingne ansanm la Compagnie des Indes, an romérsiman son travay, in füzi èk deu pistolé dékoré èk lo blazon la konpani an-larjan.
Dann 18em sièk, lo mékanik siléks bann füzi i fé k’té konpliké po tiré, parlfète cé rienk bann shassër lé plüs gabié té i niabou tiré épila rosharjé inn dérièr l’ot, san arète kour dérièr bann zésklav.
Kan i rogarde bien füzi-la, i romarke koman po fé pète larm-la, lé pa par in platine an silèks, mésoman lé par in sistèm kapsül konm i di, a-pèrküsion, plüs modèrn, la-invante dan lané 1807 (la date la-dépoze lo brévé) : lo shien i kongne dessi in kapsül an fulminate de mercure, promié lamorse par rapor lo shok …
Mésoman, i romarke bien platine-la lé kalkülé po fé rante in sistèm silèks (lo trou pardvan) èk lo bassiné dékoupé po mète son plasse in shominé. Shanjman-la, lavé fé apré kan bann kapsül platine té fine arivé, parèy la plüpar bann zarm dann débi 19em sièk, la-ansérve ankor apréça, ça i démanti pa la date lo füzi konm lo nom son propriétèr.
« Füzi Mussard, gardien la mémoir »
In léspozision anlèr létaj lo Müzé de Villélle jiska lo 20 déssanm 2024
« I ansèrve ali po shasse zanimo. An-promié füzi-la lé fé po la shasse. Apréça, li tonbe konm in lobjé « po rakonte la mémoir » akoz lassassina bann zésklav dann lépok-la.
Lané 2023, dan lo plan « in klass, in lëv ! », lo füzi François Mussard la-sèrve konm démaraj po lo projé bann zélèv lisé profésyonèl François de Mahy Sin-Piér (La Rényon).
Po la Nuit Européenne des Musées bann zélèv an-promière BAC PRO AMA Communication visuelle et plurimédia la-prézante in déssin zot la majiné a-partir lobjé patrimoine-la, anlèr létaj lo müzé.
Lo gran déssin dessi lo mür zot la-majiné avann fé, i amonte lo mayaj rantr’ demoun èk zanimo, lo jibié èk zésklav, po ça zot la-shoizi déssine in bann bébète. Zot la-amonte ossi çat bann zésklav té i kültive dann domèn, 17e sièk apartir, konm koton, kafé, kann.
IN PORTRE FRANÇOIS MUSSARD PAR LÜ-MEM
In zélév lisé François de Mahy la-fé
Domoun i koné jist mon nom, Mussard, mon pti nom François i fé plüs për ankor. Mwin lé né 25 novanm 1718 laba Argenteuil. Lo garson in kolon.
A mwin-mèm lo ronomé shassër zésklav maron dann lil Bourbon. I di mwin la « pürje » dizon tout lo bann sirk, son bann kan-maron épila in léjann i di konmsa sé mwin toussël la-tüé lo deu plüs gran shèf, Mafate èk Simandéf. 18èm sièk apartir, in bann zésklav la-komanse alé maron dan lé-O, ouça zot la-roganize zot kan poudbon. Mésoman souvandéfoi, zot lé oblijé ardsande dan lé-ba po vole zanimo, zarm, jiska bann fanm zésklav. Lo bann propriétèr i prande la kolér aforstan i vole azot, i di konmsa, va done in bon moné lo moun va trouve azot po tüé azot. Ansanm mon lékip nou roganize bann léspédisyon po boshe azot.
Na poin rienk mwin konm shassèr, mésoman domoun i koné amwin èk mon lékip nou tienbo, nou larg pa. I kri amwin « san-fatig », i di konmsa mwin lé jiska kapab rosharje mon füzi mèm-tank’ mi koure. Mwin la pa atande bann lord ofisyèl po roganize mon lékip, parlfète cé mwin lo plüs kador po fé travay-la. Lané 1744 apartir va pèye amwin po fé ça.
La Compagnie des Indes i kadote amwin konm rékonpanse in bébète füzi èk deu pistolé èk la kross an larkan.
Lërk i souke lo maron vivan, mwin lé san-pitié tél lé marké dan lo kode noir po La Rényon dann son lartik 38.
Koud’ fouét, in zorèy koupé èk in flër de-lys marké promié kou, in deuzièm flër de-lys èk lo jaré koupé deuzièm kou, la korde dann kolé troizièm kou.
« Ésploratèr lé-O » néna plüzièr landroi inportan i porte mon nom, tél la kavèrn Mussard, i tonbe laltitüd parla 2150 mètr’ dann kér Piton dé-Nèj.
