Bann « shato » Panon-Desbassayns

Dessi la fin 18èm sièk, dann kartié Sin-Pol, néna troi kaz modèl spéssial po lil Bourbon lépok-la : inn Bèrnika, l’ot Shossé Roiyal, lo troizièm Sin-Jil-lé-O.

Deu grann-janse la koloni té propriétèr troi gran kaz-la en moilon èk in létaj : Julien Gonneau-Montbrun (1727-1801) èk son bofis Henri-Paulin Panon Desbassayns (1732-1800). Zot larshitéktür i fé la diféranse sanm lézot kaz bann domèn la koloni.

Gonneau-Montbrun sinonça Panon-Desbassayns ?

Lané 1989, dann in mo d’ékri istorik, Jacques Lougnon  i prétan cé Henri-Paulin Panon Desbassayns ke la-fé bati troi kaz-la : Shossé Roiyal lané 1776, Sin-Jil-lé-O lané 1788, Bèrnika lané 1789. Na rienk Lougnon po propoze kronoloji-la, soman, po assüre ça na pwin kissoi doküman istorik, kissoi in date marké dessi lo batiman, apark po lo gran kaz Sin-Jil-lé-O (lané 1788). Dann son livr’ dessi listoir Sin-Pol, Bernard Marek  li ossi, son tour, i di konmça Panon Desbassayns mèm la-bati lo troi kaz. Soman lané 2011, Guy Panon de Richemont  lé pa dakor sanm çak Lougnon èk Marek i di. Dann son roshèrsh jénéalozik dessi bann zéritié lo promié Panon k’la-arive Bourbon, li prétan ke cé Julien Gonneau la-fé bati Bèrnika sanm Shossé Roiyal.

Lo troi kaz-la, bien sür, i konsèrne lo bopèr èk son bofis. Lané 1770, Henri-Paulin, in lansien militèr ke la-fé son karièr dan Linde, la-marié sanm Ombline Gonneau-Montbrun (1755-1846) in fiy 15 z’an, lo sël léritié Julien. Pa-sito banna la-marié, lo bopèr la-assossié son bofis Henri-Paulin po jère son bien. Gonneau-Montbrun té i gaingne la plüpar son revnü par son propriété Bèrnika. Là, li plante kafé, koton, zafèr po manjé. Dessi domèn-la néna inn kour èk in gran kaz , d’ot batiman, èk saspé, in kamp zésklav. Konm partou dan Louèst, la kour lé rantr’ la savane èk lo bann tèr kültivé. Jordi, landroi-la i apèle Maison Blanche (Lycée La Salle Maison Blanche). Ça mèm promié débü kartié Guiyom. Gonneau-Montbrun néna ossi dann milië la ville Sin-Pol lo « Gran Kour », in gran « terrain d’emplacement », in « lanplasman » konm i di jordi. Son lantré i tonbe dessi lo koté Shossé Roiyal. Lané 1769 apartir, la-komanse aménaje shemin-la .

Ondiré bien ke çak la-finanse bann kaz-la cé Julien Gonneau-Montbrun : li navé lo fortüne po ça. Henri-Paulin Panon Desbassayns la-fé ali in propozisyon : Gonneau i finanse toute, Panon i suive toute lo bann travo, mé-soman lo kaz Sin-Jil-lé-O, i rovien ali en-prope.

Néoklassik indien ?

Lo troi kaz i rossanbe bonpé : in plan réktang ; létaj prèsk-parèy, par égzanpe varang inn dessi l’ot dessi deu koté ; an-ndan in dispozisyon organizé otour in gran salle, dann ré-d’shossé konm anlèr létaj.

Somanké bann modèl kaz indien – ke Henri-Paulin Panon Desbassayns la-vü, kan li té solda dann réjion Pondichéry rantr’ 1751-1763 – la-inflüanse ali. Lané 1730 apartir, kontoir fransé-la néna in gran dévlopman politik, ékonomik. Parlfète, touça-la i aporte ossi in dévlopman la ville inportan : bann komèrsan zindien, bann Zeuropéin i fé bati gran kaz en brik, kouvèr sanm in toit tuil sinonça in térasse. La Compagnie des Indes i bati bann gran batiman ofisyèl grandioz, renomé konm çat lo gouvèrnër Dupleix. Panon Desbassayns i rèste pa toultan Pondichéry, li déplasse ali partou dessi toute bann térin-d ’batay dan la guèr rantr’ Fransé èk Zanglé. Soman li la-konï la ville-la dann son plüs gayar avan k’té krazé lané 1761.

Lo souvnir lo rishès Linde, i artrouve dan lo bann gran kaz la-bati apré dann Bourbon. Bann bèl kolone dovan lo varang dessi koté Lèst, konm koté Louèst lo kaz Shossé Roiyal, èk çat Sin-Jil-lé-O i rossanbe bien inpë d’kaz fransé d’Pondichéry bati dann zané 1750-1760. Mèm shoz po bann toit-térasse navé dan Linde, ke té ansèrve lo téknik largamasse. Lé pa sür ditou bann masson indien la-vni done la min, somanké navé in laranjman rantr’ bann komanditèr sanm bann zouvrié kontoir fransé kan Henri-Paulin té fine artourné. Saspë deu-troi la-vni Bourbon jist po lo shantié.

Si ou i argarde bien en détay lo troi gran kaz-la, dan lépok zot té bati (1770-1780), somanké néna in deuzièm linflüanse dan lo stile: lo néoklassissism. Ça in mouvman larshitèktür i dévlope dann milië 18èm sièk dan Lerop, épiça i fane vitman sirtou dann bann koloni fransé, anglé. Lo plan, la simétri bann létaj prinsipal, lo distribüsyon bann pièsse, i rapèle bonpé bann batiman néo-paladien, dan Langletèr, konm dan la Franse zané 1750-1760 apartir.

Lo bann gran kaz Desbassayns lé pa kouran, dizon lé ünik dann Bourbon. Bann kaz-la i amontre bien in mélanj lo stil rantr’ lo tèknik Linde sanm linflüanse Lerop. Parlfète i pouré jiska dire in larshitèktür néo-klassik Linde.

Bann modèl ke la pa düré

Dapré Albert Jauze  , in kaz dann Bourbon 18èm sièk néna in sürfasse 29,5 m2 apepré. Lo kaz en boi, dabitüd lé kouvèr sanm féiy, lo plafon lé ba, lé mal ékléré  : « Il est plus aisé de recourir au bois, très répandu, dont les techniques de mise en œuvre issues du Vieux-Continent et apportées notamment par les charpentiers de marine sont éprouvées » . Souvandéfoi lo kaz néna rienk in nivo, èk in toit deu pante, sinonça kate pante. In litografi Antoine Roussin èk in foto lané 1897 i amontre in kaz 18èm sièk, i done anou in bon lidé dessi in kaz ordinèr po bann plantër zépisse, sinonça kafé.

N’i koné té rare i ansèrve la pièr dann deuzièm moitié 18èm sièk . Soman, « le particulier qui souhaite [recourir à construire en pierre] doit non seulement pouvoir, en outre se procurer à prix fort de la chaux [pour le mortier] mais aussi compter sur de bons ouvriers. […] La chaux, produite à partir du corail, est faite à deux endroits à Bourbon [en 1770], au Repos Laleu et à la Rivière d’Abord ».

Bann zinformasyon-la i amontre anou bien lo kalité éksépsyonèl, vantar bann kaz Desbassayns : lé bati ansanm moilon massoné, èk in landui, épila po lo bann zangl, pièr en bazalte tayé. Kaz-la i mezüre 590 m2 par-la, en deu nivo, i fé k’i tonbe lo plü gran kaz bati dan la koloni, dan la fin l’Ancien Régime . Lépok-la, li galize jist sanm in ot kaz privé : lo Shato lo Gol, bati la plène Sin-Lwi lané 1747 par-la. Antoine-Marie Desforges Boucher (1715-1790), in linjéniër Compagnie des Indes, gouvèrnër jénéral bann zil Maskaringn, depi lané 1759 jiska lané 1767, la-déssine bann plan shato-la. Li néna in batiman prinsipal èk in létaj kouvèr ansanm in toit mansardé, par dovan néna in galri dessi lo deu nivo koté Süd. Somanké Desforges-Boucher la-pran modèl dessi lo kaz malouinière bann zarmatër breton.

Lé pa rienk bann kaz Desbassayns néna la varang, soman dessi deu nivo, ça lé vréman rare po 18èm sièk. I artrouve modèl-la èk létaj koté Nor la küre Sin-Dni, rajouté dann zané 1750. Jordi la-fine modifié. Anplüs, lo modèl varang dessi deu koté, konm dan lo kaz Villèle èk çat Shossé Roiyal, na pwin d’ot parèy dann tan-la. Lo varang i forme in gran pièsse po anpare solèy dan la salle o-milië, i forme in léspasse kouvèr, rouvèr dessi lo jardin. Lo varang lo kaz Bèrnika lé jist koté Louèst, jordi lé kashiète par çak la-rajouté dann zané 1970. Sin-Jil-lé-O, la-fèrme lo bann varang koté Lèst, apré lané 1848, lo fassade koté Louèst tan-k’ali lé toujour rouvèr.

19èm sièk, néna rienk in notab la koloni, François-Xavier Bellier-Montrose, la-tire modèl dessi lo troi kaz Desbassayns ke té bati fin 18èm sièk. Rantr’ zané 1825-1827, somanké dapré in plan Jean-Baptiste Renoyal de Lescouble la-fé po li, li fé batir laba Boi-Rouj Sint-André, in gran kaz familial en moilon èk doub varang o-milië koté Nor. I rossambe bien lo kaz Sin-Jil-lé-O, sinonça lo Gran Kour Sin-Pol. Promié débu, Boi-Rouj lé kouvèr èk in largamasse, konm bann kaz Desbassayns. Soman lé pa sür ditou bann kaz Desbassayns-la la-sèrve modèl po lo kaz Boi-Rouj.

Aprè Madanm Desbassayns

Lané 1800 kan son mari lé mor, Ombline Panon-Desbassayns i érite Sin-Jil-lé-O. Lané apré, kan son papa lé mor, èl i érite Bèrnika, plüs lo térin lanplasman Shossé Roiyal. Lané 1846, kan él lé mor son tour, la-partaje son bien : Sin-Jil-lé-O i rovien bann famiy Villèle ; Bèrnika lé partajé rantr’ Joseph Panon Desbassayns, Euphrasie Pajot, Ursule Hamelin èk Claire Vetch, zot toute lé son déssandan ; lo Gran Kour i rèste dan lindivizion. Dessi lo deu domèn agrikol néna shakinn in lüzine do-sik, bati dann zané 1820-1830.

Depi lané 1846 jiska 1974, lo gran kaz Sin-Jil-lé-O cé lo propriété bann zéritié Jean-Baptiste de Villèle, jiska tank’ lo Départman La Rényon la-ashté. Lo plüs gran shanjman zot la-fé dann zané-la, cé d’ fèrme lo bann varang po agrandi la kaz. Saspé lavé rénove kaz-la, dann zané 1930, parsk la-mète fenète en boi deu batan po ranplasse fenète in batan. Depi lané 1974 lo kaz Villèle la-vni in müzé istorik, la-fé inpé d’ shanjman an-ndan la kaz.

Lané 1847, Edouard Manès i ashète lo domèn Bèrnika. La famiy Etchegaray lé propiétèr depi lané 1855 jiska 1873. Lo kaz i rèste parèy : la fin 19èm sièk èl néna ankor in toit-térasse, èk somanké ankor bann varang rouvèr dessi koté Louèst. Lané 1909, la famiy Martin i rashète lo kaz Bèrnika, davoir la- shanjé komansman 20èm sièk : la-poze troi toit kate pante po ranplasse lo toit-térasse. Saspé mèm lépok-la, la-fèrme lo bann varang té i done koté mèr. Lané 1920, lo domèn i tonbe dann patrimoine la S.A. de l’Éperon. Lo 18 déssanm lané 1940, bann zadministratër sossiété-la i vande lo kaz Bèrnika èk lo troi zéktar la tèr bann Frères des Écoles Chrétiennes po fé in kolèj dessi. La kongrégasyon i shanje en gran lo bann fassade, i rajoute batiman en plüs. Jordi, cé in lanèks Lycée La Salle Maison Blanche.

Po fini, rantr’ 1846-1854, lo gran kaz Shossé Roiyal, lé pa partajé. Lo 9 julié 1854 i vande ali lankan. Camille Jurien de La Gravière, lo sël fiy Joseph Panon Desbassayns, i ashète lo kaz. Lo 18 séktanm 1858, six zan apré, konm madanm-la i ème bonpé la relijion, èl i sède Lévéshé lo térin lanplasman. I bati in kolèj batizé Saint-Charles. Deuzièm moitié 19èm sièk la-monte in sharpante-tuile dessi lo toit-térasse. Lané 1874 par-la, lërk i transfère lo kolèj-la Sin-Dni, lo kaz i rèste vide, i dégrinne : dann zané 1950, i tonbe totalman en ruine. Lo toit, lo planshé, lo fenète kissoi vitré, kissoi en bois, na pü rien. Lo bann zandui lé bien abimé.

Lané 1959, Lévéshé èk lantante shinoi Kuo-Ming-Tang i signe in konvansyon. Lantante-la i rénove lo kaz. Lo Pèr Antoine Lan Pin Ho i rouve in lékol franko-shinoi an-ndan. Bann klasse lé anba, lo dortoir anlèr létaj. Lané 1970, kan i fèrme lékol, i transforme ali en dépo. Depi 1982 jiska 2011, Lamikal franko-shinoi i ardone landroi-là son misyon kültirèl. Apréça Lévéshé la-sède ali la münissipalité Sin-Pol.