Lékonomi plantasyon : létablisman kann Desbassayns, in lüzine modèl ?

In gayar kontèks po fé in bann lüzine modèl

Lané 1830, in périod la kroisanse lékonomi sükrièr Bourbon, èk in bonpé karo kann, èk in bonpé lüzine, té po fini. Lindustri kolonial i rantre en kriz. Ça lo rézilta bonpé rézon, sirtou komèrsial, indistrièl . An-plüs lo konkuranse do-sik bétrav, in taksasyon k’i pénalize azot, bann zindustrièl Bourbon i gaingne pi vande zot sik konm i fo. An-plüs i fo dire ossi ke lo kalité zot sik la-bèsse in bonpé. Akoz la-plante ossi kann dessi mové térin, randman la-béssé, la kalité lo vézou la-shanjé. Bann ju-la lété tro mélanjé, malizé po travaïye, té i done in kalité do-sik té i suporte pa bien lo voiyaj juska la métropol.

In bonpé lüzinié lété déja dann malizé : siklone 1829 la-fatigue zot plantasyon kann, zot tiktak ashète plizanplüs la tèr, ogmante plizanplüs bann zatelié travaïy. In bonpé rantr’ zot té-fini en fayite. La kriz la-forse azot shanje la manièr amène zot létablisman.

Na inpé – bann çak navé dekoi – la-préfère plasse larjan dann teknoloji nouvo, çat bann lüzine do-sik bétrav la France. In ot fasson fé, konplèmantèr, ansèrve bann teknik èk bann mashine Joseph Martial Wetzell la-amène ék li. Messié-la té in linjéniër, in léspéssialis (ke) Konsèy Jénéral la-fé vnir dopi la France. Son lidé sé — olërk utilisé in teknoloji modèrn-modèrn mèm, tro shèr — i fo majine in solisyon po règle lo problèm produktivité, po fé plüs do-sik plüs méyër kalité. Po ça, i fo niabou mié ansèrve çak lé lokal : lékipman, lo téknik fabrikasyon, lo bann laparèy, la situasyon lokal, in solusyon en mèm tan ékonomik, sinpe, solide, k’i marshe bien.

Lo shoi Sin-Jil konm lüzine modèl

Lané 1830, lërk Wetzell la-arive Bourbon, li la-désside kissoi monte, kissoi ékipe in lüzine modèl dann shak komine. Sré in légzanpe po bann lüzinié çak noré lanvi fé parèy po zot létablisman. Lo Konsèy Jénéral i püblye lo 11 mars 1831 in sirkulèr po li oblije toute konsèy munissipal shoizi in « lüzine modèl ». Va fé lüzine-la dann in landroi santral po rande plüs fassil la vizite d’ot lüzinié.

Po Sin-Pol, lo konsèy munissipal i désside ke lüzine la vëv Desbassayns sar lüzine modèl. La-shoizi la famiy Desbassayns porézon zot renomé, porézon la plasse Joseph èk Charles lavé dann promié débü la kültir kann, lindustri do-sik, porézon zot lavé la fortine (po shanje lüzine, po fé zéspérianse, i fo bonpé larjan), porézon lanplasman zot labitasyon dann milié réjion sükrièr louèst, porézon lo bann shemin té i amène dirèk zot létablisman. Po samèm lüzine Madam Desbassayns-la la-vnu in landroi lo plüs inportan po lo progré téknik lindustri do-sik Bourbon.

Wetzell la-fé son travay Sin-Jil lé-o en deu tan :
– promié tan, komansman lané 1830, li refé toute lo fonksyoneman lüzine : lété lo plüs gran bezoin bann létablisman.
– dézièm tan, la fin lané 1830 apartir, i invante bann nouvo laparèy po fabrike do-sik.

In modèl po shanje en gran lindustri do-sik dann péi Bourbon

Shanjman total lüzine : promié moitié lo bann zané 1830

Dann lüzine Sin-Jil lé-o, Wetzell i komanse par travaïye dessi lo bann vézou po gaingne in sik plüs méyèr kalité. Po vréman, lékstansyon kültir kann dessi mové térin la-amène in gran mélanj dann la kalité bann vézou, épila mové rézilta bann lüzine.

Depi la fin mois d’mars 1831, li la-kalkile lo shanjman dessi lo bann batri d’shodièr — lo prinsipal dann lüzine po trète lo vézou. Li la-kalkile ossi toute lo konsékanse dessi lorganizasyon, lo fonksyoneman jénéral lüzine. Li pran ossi prékosyon pa shanje tro larshitèktir po pa k’i dépanse tro. Lané 1832, in plan lo bann modifikasyon lüzine i fé konprann lo travaïy Wetzell la-fé.

Linjéniër Wetzell i fé monte in nouvo batri èk 6 shodièr, promièrman po améliore lépurasyon, dézièmman po in bon lanshènman lo bann zopérasyon (avan, lanshènman-la navé poin akoz lo dézièm batri po le siro lété dann in dézièm batiman), troizièmman po utilize moins d’travaiyër akoz dann tan-la, la min-dèv lété rar. Po ça mèm, Wetzell i fé instale bann shodièr-baskul (ke) li la-fé léssèy dann Chaudron, li fé instale in bann robiné, in ponpe monte-ju po rann lo transvidaj plüs fassil, plüs rapide. Li la méte a-koté lo batri in prèsse-lékime po ashève tire in réstan vézou èk ankor do-sik an-d’dan. Po raproshe lo bann lopérasyon filtrasyon èk çak la batri, li fé mète in bann filt dan lo batiman tab do-sik (ke) li fé konstruire jist koté lüzine.

Lüzine Desbassayns la-fé son prope modèl, èk in nouvo téknik. Li la-pran légzanpe dessi lüzine Chaudron, lo promié lüzine do-sik èk filtrasyon, in manièr-fé bann lindustri bétrav té i utilize, té pankor arive Bourbon. La sükreri ék lo nouvo batiman tab do-sik lété en lékèr èk la purjri. In fois té fine tire lo bann bak èk lo batri po lo siro, la-fé in purjri èk lansien batiman tab do-sik. Purjri-la té i ansèrve bann réssipian en réktang, in manièr-fé té i trouve pa ankor dann lindustri do-sik.

Astër, n’i gaingne bien èsplike lo téknik fabrikasyon do-sik apré lo promié travaïy Wetzell :
In fois kann la-fine arive par sharèt mulé, lo moulin lüzine té i kraze ali. En promié, lo vézou té i arive par in monte-ju jiska dan la sükreri, épi-la li koule dan in bak-dékantasyon po tire in pé lo bann mashur. Lo vézou i passe dan lo promié shodièr (lo gran shodièr) po apropte ali. I ansèrve la chaux èk la shalër po fé kaïye lo bann salté i rèste ankor : i apèle ça lékime. I tire ali èk in prèsse-lékime. Lo vézou apropté i passe dann 3 shodièr-lévaporasyon : la-dan lo siro i épéssi, i fé koule dan lo sinkièm shodièr i apèle « siro ». I anvoye siro-la dann filt Dumont po tire lo dernié guiguine mashur, po klèrsir ali. Astër, lo siro lé paré po épéssir. Par lo monte-ju, li tonbe dann shodièr-la-kuite po atrape son degré d’kristalisasyon, k’i kontrole par la « prèv-o-fil siro » . Apréça i vèrse lo sik dann bann tab de-sik , i étale bien, i lésse frédi po gaingne do-sik en grin. Kan lo sik la−fine formé, po li sèke bien, i anvoye ali dan la purjri, dann bann moul po tire lo siro réstan. Siro-la, i ranvoiye dan la shèn fabrikasyon. Aprè deu, troi semèn dann moule, lërk la-fine pèrde in bonpé son leau, i mète po sèk dessi sézi dann solèy, dessi in largamasse (in plateform atèr), ou sinon dessi in toit. Kan li la-fine bien sèk, i anbale ali. La, li lé paré po voiyajé.

Wetzell i majine in nouvo shodièr : dézièm moitié lo bann zané 1830

San mète par koté lidé fabrik in plüs gayar kalité do-sik, Wetzell i kontinué son travaïy. Li majine, po bann lüzinié, in laparèy po gaingne ankor plüs do-sik. Lo point-fèb lo sistèm tèl ke lété : avan, kan té fé la kuite lo siro, kan-mèm bien komkifo, in pé do-sik pa kristalisé té i pèrde dan la mélasse.

Po kontourne malizé-la, dé-sèrtin lüzinié péi té i ansèrve in mashine i sorte dann lindustri bétrav : in shodièr po fé kui sou−vide po niabou kontrole lo kristalizasyon, in létape kapital dan la fabrikasyon. Sinpleman, téknoloji-la lété pa po toute demoun, rienk po bann zindustrièl rish.

Déja lané 1834, Wetzell i rode in manièr po fé in lévaporasyon èk in tanpératur lo pli ba k’i gaingne. Ça po anpèshe lo karamélizasyon. Karamélizasyon-la i arive sirtou lërk lo vézou lé pa bien pur. Wetzell la-règle lo problèm èk son « shodièr tanpératur ba» . Dann bann lakte notèr, dann liv téknik konm pa, shodièr-la, bien renomé, i apèle ossi «tanpératur ba», « shodièr Wetzell », « Wetzell », « rotatër ». La famiy Desbassayns la-ède in bonpé po dévlope bann shodièr-là. Téknik lokal-la la-ranplasse lo tecknoloji shodièr-lo-vid, té i sorte déor. Dann dézièm moitié XIXèm sièk, bann lüzinié Bourbon la-ansèrve diféran kalité modèl bann shodièr-la. Zot lété 4 fois moins shér ke shodièr-lo-vid. Zot lété solide, té i marshe bien, lété fassil po okupé. Po ça-mèm zot lété dann toute lüzine la koloni : depi 1851 jiska 1860, 96 % bann lüzine do-sik Bourbon navé o−moins inn konmsa. Lané 1870, plüs 90 % lüzine té i utilize ankor po kui zot siro.

Konkluzyon

Èk toute lo bann systém li la-invanté — ke d’ot apré li la-améliore ankor —lingéniër Wetzell la-bati in modél indistrièl ke té i tourne — inpé— lo dos èk lo mashinisme, mé-soman ke té i koresponde èk çak bann lüzinié lavé bezoin. Konm Jean-François Géraud i ésplike dann son bann reshèrsh, Wetzell la-méte an-plasse in téknoloji plüs fassil, i amontre bien lo mank kapital bann lüzinié. Té i utilize pa plüs zésklav, akoz la min-dèv lé plüs rar. Té i demande p’azot fé in travaïy plüs konpliké : na poin bonpé té vréman kalifié. Mé-soman lo progré lé si tèlman gran ke déja lané 1835 42 létablisman i utilize modèl-la. Lüzine Sin−Jil, landroi la-mète an-plasse en promié lo bann zaméliorasyon, la-fé vrèman son travaïy létablisman-modèl, i sava jiska plüs loin, dann pèi déor. Va fabrike bann zaparèy Wetzell dann bann lüzine construksyon mékanik en France, va artrouve azot dann bann létablisman Losséan Indien (Moris, Madagaskar, Nosy-Bé, larshipèl Komor), dann Karaïb, bann Zantiy fransé, Brésil jiska lo provinse Wellesley Malaka.